Yaponiyalik dizayner Shingo Sato KIUTda master-klass o‘tkazdi
Toshkent Kimyo xalqaro universitetida yaponiyalik dizayner va instruktor Shingo Sato ishtirokida moda dizayni bo‘yicha master-klass tashkil etildi.
Shingo Sato moda olamida “Transformational Reconstruction” usuli bilan tanilgan. Ushbu metodda kiyim konstruksiyasi an’anaviy tarzda faqat qog‘ozdagi andoza orqali emas, balki maneken ustida uch o‘lchamli — 3D shaklda yaratiladi. Dizayn chiziqlari bevosita kiyim shakliga tushirilib, keyinchalik yangi andozaga aylantiriladi.
Master-klass davomida Shingo Sato o‘z metodini amaliy jarayonda namoyish etdi. Ishtirokchilar geometrik va erkin chiziqlar yordamida kiyim konstruksiyasini o‘zgartirish, hajm va shakl bilan ishlash hamda oddiy bazaviy andozadan murakkab dizayn yaratish jarayonini o‘rgandilar.
Shingo Sato ushbu metod bo‘yicha Yaponiya, Italiya, Buyuk Britaniya, AQSh, Kolumbiya va boshqa mamlakatlarda workshop va master-klasslar o‘tkazib keladi.
